Nafarroako Estatistika Erakundearen eginkizun nagusia da funtsezko adierazle edo datuen bidez ezagutzera ematen duen estatistika-informazioa sortzea. Garrantzia, konparagarritasuna edo argitasuna dira estatistika-jarduera zuzentzen duten balioetako batzuk.

Nastatek estatistika-informazioaren neurrirako eskaerei ere erantzuten die eta, hala, gizarte-eragileen eta herritarren behar bereziei erantzuten die. Ildo horretan, Nastatek aurreikusten du prozesamendu espezializatuko gela bat gaitzea, zenbait eragiketaren mikrodatu anonimizatuak kontsultatu eta prozesatzeko.

Nastatek estatistika-informazioa koordinatzen du, Datu-base komunen kudeaketaren bidez eta adierazleen sistema zentral batean eragina duen gobernantza-sistema baten bitartez.

Helburua informazioa homogeneizatzea eta sustatzea da eta, hala, hura ekoizteko eta irisgarria izateko bide ematea.

Datu estatistikoak zabaltzeko bide nagusia web-orria da. Tresna honek esperientzia egokia ahalbidetzen du bistaratzeen edo taula estatistikoen bidez, kontsulta- eta euskarri-maila bakoitzera egokituta.

Nastatek zabalkunde-bide berriak sartzeko asmoa du, hala nola jardunaldiak eta ekitaldiak egitea, eskola-web bat martxan jartzea, estatistika-liburutegi bat martxan jartzea edo argitalpen berriak sortzea, erabiltzaile mota desberdinetara iristeko eta estatistika-datuen erabilera sustatzeko.

Nastatek, betetzen duen estatistikako lan publikoa kontuan hartuta, laguntza pertsonalizatua eskaintzen die datuen analisiaren edo aholkularitza metodologikoaren inguruan erabiltzaile-mota guztiei, dela Nafarroako Gobernuko beste sail edo erakunde batzuei, dela estatistika-arloan zalantzak argitzeko laguntza behar duten herritar anonimoei.

Nafarroako Estatistika Erakundeak alderdi hori garatzeko zenbait ekintza aurreikusten ditu, besteak beste, gardentasun-atari bat edo herritarrei arreta emateko aurretiko hitzorduaren zerbitzu bat abiaraztea.